مسلسل الإختيار شخصية سالم أبو لافي الحقيقية
مسلسل الإختيار
"سالم أبو لافي"
.....
الناس اللي سألت مين سالم الحقيقي؟؟
ياترى دا شخصية حقيقية ولا بجد؟؟
#سالم_أبولافى من تاجر مخدرات لمؤسس كتيبة سالم لمحاربة داعش
هو ازاى يتعاون الشهيد #المنسي مع #سالم_ابو_لافى المتهم بجرائم قتل وتهريب مخدرات فى عصر مبارك والإخوان
العلاقة كانت صحيحة ووثيقة مليون المية بس القصة اللي بيروجولها مش صحيحة مليون المية علشان تعرف ترد على اي حد غبي بينقل كلام وخلاص 😉
علشان نفهم القصة لازم نرجع لهدنة 2007 بين الداخلية وشيوخ قبيلة الترابين كان فيه 7مطالب أساسية منها الإفراج عن المعتقلين وإدارة المخابرات بدل من الداخلية لملف سيناء والسماح بتملك الأراضي وتوفير فرص عمل وإلغاء الأحكام الغيابية وغيرها.. لكن محصلش حاجة والعادلي رفض وعاند
بعدها حصلت مناوشات وبدأ يبرز دور سالم أبولافي كقائد بدوي بعد صدامات مع الشرطة كانت نتيجتها مقتل 4 من البدو من قبيلتي الترابين والرياشات وإصابة العشرات من الجنود وحصل نهب لأسلحة كتير وحصار لنقاط شرطة واختطاف لجنود واللي في روايات عن توسط أبولافي لتحريرهم مقابل التهدئة.
بعدها اتحبس سالم ولكنه هرب من عربية الترحيلات في 2010 واتقتل في العملية النقيب أحمد أسامة معاون مباحث بئر العبد والمجند سيد غريب وبقى متهم بقتلهم واتحامى في قبيلته ورغم المحاولات الكتير لاعتقاله إلا إن كلها فشلت رغم التعزيزات وكل مرة كانت بتقوم حرب مصغرة وبيفلت منها.
فضل أبو لافي هربان متهم بالقتل وحيازة المخدرات والتهريب والوضع استمر كده لحد بعد الثورة ما أسقطت الأحكام الغيابية ومنها أحكام أبولافي اللي بدأ حياة جديدة وعمل شركة مع شيوخ الترابين واستقر في القاهرة.
مع عودة #منسي من باكستان اللي كان فيها في الملحقية العسكرية تولى الكتيبة 103 صاعقة بعد الشهيد رامي حسنين غير الأوضاع على الأرض ونسق مع القبائل وخصوصا الترابين لحصار #داعش والقبائل أعلنت الحرب ورجع سالم يقود عمليات القبيلة على الأرض في مايو 2017 ضد داعش
👈 سالم اول ما رجع سينا قال اللي هشوفه بيتعاون مع داعش من القبائل هسلمه بنفسي
لكن داعش اغتالته هو ورجالته بعد عودته بأيام وعملوله فخ بمركبة من مركبات الجيش المسروقة قربت من مكان تواجده وأطلقت عليه الرصاص.
وبعدها بشهرين في يوليو 2017 تم اغتيال الشهيد منسي ورجالته في #كمين_البرث اللي كانت عملية نوعية غير مسبوقة استهدفت #منسي تحديدا.
يعني سالم أبولافي لما شاف داعش بتقتل في ولاد بلده وجيش بلده اتحول لمقاتل واستشهد وهو بيدافع عن بلده وأهله ضد الإرهابيين الدواعش وبينسق مع الجيش في المواجهة.
طبعا ده اختصار شديد للأحداث والتفاصيل
بالمناسبة في فرق كاملة من اهالي سيناء بتدافع عن سينا زي جيشنا
اللي زي ابولافي كتير ممكن بسيرش صغير هتشوف اصدارات داعش عن الشيوخ والشباب اللي تم اغتيالهم بسبب تعاونهم مع الجيش
ده دور سالم ابو لافى ولازم نوضح ده علشان الناس تعرف ترد وعلشان الناس تعرف ان جيشنا مش خاين ولا جيش معندوش شرف بيتحالف مع اي حد وعلشان الناس ماتحسش انها وحدها في الدفاع ضد المتأسلمين والموتورين بيستخدموا صورة منسي وأبو لافي لأغراض قذرة وخبيثة
رحم الله شهداء الوطن وأسكنهم فسيح جناته سالم ابو لافى ومنسى وباقى رجال الكتيبة
#أحمد_عبدالله
ليست هناك تعليقات:
إرسال تعليق